Løa, laurdag 26. august klokka 16.00
I dette innhaldsrike litteraturarrangement inviterer poet og festivalsjef Øyvind Rangøy diktarvenner frå sine to heimland, Estland og Noreg. Gjennom samtale, musikk og opplesing blir vi med på ei reise gjennom indre og ytre kyst- og havlandskap.
Asko Künnap (f. 1971) er grafikar og designer, men også poet og seglingsentuasiast. Han er prislønt bokdesignar og grafikar og har også laga omslaget til diktsamlinga Dødsbu fra Rangøya. Hans utstilling prydar naustveggen under heile kulturhelga – her får vi også møte han som poet.
Simen Kjærsdalen (f. 1972) er musikar, komponist og medlem i diktarfellesskapen Kammerpoetane. Under kulturhelga møter vi han også under konserten søndag, men i 2022 gav han også ut diktsamlinga Gloria! Her får vi høyre hans eigne tekstar akkompagnert av strengemusikk.
Klara Hveberg (f. 1974) er frå Molde og utdanna matematikar. Då sjukdommen ME førte henne ut av arbeidslivet, fann ho den skjønnlitterære skrivinga som førte fram til romanen Lene din ensomhet langsomt mot min som har blitt omsett til både engelsk, dansk, tysk, polsk og koreansk, med fleire språk på gang.
Veronika Kivisilla (f. 1978) er frå Estland, poet og folkemusikkentuasiast. Ho har arbeidd som prosjektleiar i den estiske forfattarforeininga, men har også på eige initiativ lært seg norsk. Saman med Adam Cullen og Øyvind Rangøy har ho mikroforlaget Seitse Sõlme (Sju Knop). Vi får høyre hennar tekstar – og kanskje syng ho også på norsk!
Maarja-Liis Mölder (f. 1994) er frå Estland og er poet. I 2019 debuterte ho med diktsamlinga «Ein skal ikkje slå andre» på same estiske forlag som Øyvind Rangøy. Vi får høyre hennar tekstar og hennar inntrykk av den norske kystnaturen.